A Asociación Amigos do Casco Histórico informa sobre posibles axudas á rehabilitación

A Asociación Amigos do Casco Histórico de Betanzos, na súa tarefa de sensibilizar a todos os cidadáns sobre a necesidade de mellorar o estado deste Conxunto Histórico Artístico, está a proceder a repartir uns folletos onde se recollen posibles axudas e subvencións a particulares, anunciadas pola Xunta de Galicia dentro do Plan Integral Conxunto de Rehabilitación, e que serán obxecto de convocatoria nos próximos meses.      O contido desta primeira folla informativa, céntrase nas anunciadas axudas en Áreas de Rehabilitación do Camiño de Santiago, e as axudas á rehabilitación de inmobles en conxuntos históricos, das cales se poderán beneficiar moitas das nosas vivendas, ben por estar situadas por onde discorre o camiño inglés, ou enmarcadas no noso centro histórico, declarado Conxunto Histórico Artístico e Ben de Interese Cultural.      Estás axudas, que poderán ser compatibles e acumulables, poderán chegar aos 21.600 euros para a rehabilitación e 23.600 euros para o caso da renovación, e poderán tramitarse a través da Oficina de Rehabilitación de Betanzos, situada no edificio do Concello de Betanzos na Praza da Constitución, onde os interesados poden solicitar máis información.

Preme na imaxe para ver ampliada esta folla informativa Tamén podes descargar esta folla en formato pdf