jueves, 22 de abril de 2010

Aberta a licitación do Albergue de Peregrinos de Betanzos

     A Sociedade Pública de Investimentos de Galicia sacou onte mércores, a licitación esta actuación, xunto á construción doutro catro albergues en Galicia.
     As empresas interesadas en concorrer ao concurso poden presentar as súas ofertas antes do 13 de maio, ás 12.00 horas, e a mesa de contratación está prevista para o próximo 15 de xuño. O prazo de licitación é de 10 meses, que pode ser reducido nalgunha oferta, ainda que de todos os xeitos non pode esperarse que a obra empece antes de finais de xullo, polo que resulta case imposible que a obra esté rematada para disfrutala neste Ano Santo.
     En calquera caso, esta licitación é un paso importante do que todos debemos felicitarnos, de cara a que podamos gozar desta importante infraestrutura que sen dúbida colaborará a dinamizar Betanzos en xeral e o seu casco histórico en particular.

A prensa de hoxe fai referencia a esta importante noticia:

Recorte da edición dixital do xornal  “La Opinión” correspondente ao xoves 22 de abril de 2010

Recorte da edición dixital do xornal  “La Opinión” correspondente ao xoves 22 de abril de 2010

miércoles, 21 de abril de 2010

Betanzos estrea novos paneis informativos no Casco Histórico

novos paneis informativos en Betanzos

     Aínda que con certo atraso sobre o previsto, lembremos que a súa instalación estaba prevista para o mes de novembro pasado, comezou a instalación de novos paneis informativos no noso casco histórico.

     Os novos paneis en tres idiomas: galego, español e inglés, e cunha nova disposición en vertical, veñen substituír aos antigos, unicamente en idioma galego, que se instalaron nos tempos nos que o BNG detentaba a Concellería de Casco Histórico, supoñendo naquel entón un importante avance.

     Outras forzas políticas, a propia Asociación Amigos do Casco Histórico e en xeral, veciños e visitantes de Betanzos, fixeron notar repetidamente a necesidade de que estes paneis estivesen nas tres linguas máis utilizadas polas persoas interesadas en coñecer o noso patrimonio, e agora empeza a concretarse esta petición.

     Esperamos que nos próximos días váianse renovando todos os paneis que nos 36 lugares diferentes da nosa cidade, dedícanse a explicarlle ao cidadán a importancia do que está a ver en cada caso.

     Como a felicidade poucas veces pode ser completa, xa empezaron a xurdir as primeiras críticas referentes á tradución do texto ao inglés, que a dicir de varios expertos en moitos casos non é a máis acertada e mesmo ás veces con tantos erros que a fan incomprensible.

     Esperemos que isto último se corrixa, e que se acuda a un experto coñecedor da lingua inglesa para traducir estes textos para os paneis que faltan por pór, e corríxanse os fallos que houbera nos xa postos.

     Polo resto non cabe máis que felicitarnos todos polo feito de que por fin se concrete esta iniciativa tan necesaria para a imaxe e promoción do noso Casco Histórico.

novos paneis informativos en Betanzos

jueves, 8 de abril de 2010

“Restauro” unha revista internacional do patrimonio histórico, feita en Betanzos

restauro

     Restauro Revista internacional do Patrimonio Histórico, dedícase a tratar temáticas relativas á conservación, restauración e rehabilitación do patrimonio cultural. Ten a súa redacción e lugar de impresión en Betanzos, e diríxea Juan María García Otero, moi coñecido polos seus traballos sobre Betanzos e as súas colaboracións no Anuario Brigantino, sendo o seu coordinador xeral Alfredo Erias Martínez, director desta última publicación e tamén do noso Museo e Biblioteca Municipal.

staf_restauro

     A revista, ademais de distribuírse nunha coidada impresión en soporte papel, tamén pode consultarse en formato pdf a través da súa páxina web www.revistarestauro.com

Artigo de opinión de José Manuel García Iglesias en El Correo Gallego

     No pouco tempo que leva de vida, a revista xa suscitou as críticas máis favorables pola calidade do seu contido e a súa coidada presentación. A última delas aparece un un artigo de opinión asinado por José Manuel García Iglesias en El Correo Gallego, do que é colaborador habitual.

    José Manuel García Iglesias entre outras cousas, é Catedrático de Historia de Arte Moderna e Contemporánea na Facultade de Xeografía e Historia da Universidade de Santiago desde 1986.

     Desde a Asociación Amigos do Casco Histórico de Betanzos, desexámoslle longa vida a esta publicación, que contribúe coa súa calidade a acrecentar o noso orgullo como betanceiros, incorporándoa para facilitar o seu mellor acceso á nosa lista de ligazóns.

jueves, 1 de abril de 2010

Semana Santa en Betanzos

     Durante estes días o noso casco histórico acollerá os desfiles e procesións que conforman a tradición varias veces centenaria da revitalizada Semana Santa betanceira.

Logo 
Logotipo da CONFRARÍA DA SEMANA SANTA DE BETANZOS
Deseño de Carlos Álvarez
enlace_semanasanta

     Pulsando nesta ligazón, ou na imaxe da esquerda, poderás ver un apartado que dentro da páxina do Concello de Betanzos, www.betanzos.net dedícase á Confraría da Semana Santa de Betanzos.
     Nel poderedes ver fotos, vídeos, programa de actos e procesións correspondentes a este ano 2010,  e ademais un artigo de Carlos Álvarez López, baixo o título de "Evolución da Semana Santa en Betanzos", aparecido no Anuario Brigantino correspondente ao ano 2007.

     Carlos Álvarez López, é membro fundador e Vicepresidente da Confraría da Semana Santa de Betanzos.