Concerto fundación CIEC

Hoxe venres 12 de xuño ás 20.30 horas na Casa Núñez, Sede da Fundación CIEC de Betanzos terá lugar o concerto de 2uS dentro no ciclo ESPAZOS SONOROS

O gurpo está formado por Fernando Abreu (clarinete en Bb, A, Eb e clarinete baixo) e Pablo G. Carrera (guitarras acústica e eléctrica)

2uS lese “dous”. Simple. Porque son dous músicos. Dous instrumentos reflectidos o un no outro coma nun espello. Dúas procedencias diferentes que converxen nun mesmo punto: visións diferentes pero complementarias. Unha dobre personalidade de son acústico e eléctrico, temas libres e outros máis melódicos e elaborados. Porque a aventura de Fernando Abreu (clarinete, membro do cuarteto Caramuxo e colaborador, entre outros, de Mercedes Peón, Sete Saias, Es un Árbol…) e Pablo Carrera (guitarra eléctrica en Dr. Harapos) se nos adianta con toda unha declaración de intencións: en Só son sons non hai que tratar de buscar razóns teóricas, senón deixarse levar pola sonoridade e gozar a música dun xeito máis sensorial e menos intelectual. Música instrumental con amplas influencias do jazz, do funk, da música contemporánea, da world music...

2uS achéganos unha fórmula musical moi próxima ao concepto actual de jazz europeo: hai improvisación, pero tamén elementos e influencias do amplo espectro de estilos musicais que comparten ambos os músicos.