“A ASOCIACIÓN AMIGOS DO CASCO HISTÓRICO ARRANCA COA SÚA PRIMEIRA XUNTA DIRECTIVA”

Tal e como vos informáramos, no serán do 30 de xuño de 2009 tivo lugar a primeira Asemblea Xeral de Socios da Asociación Amigos do Casco Histórico de Betanzos, no que constitúe o seu arranque oficial coa aprobación da súa primeira Xunta Directiva.

A orde do día arrincou coa presentación, por parte da Xunta Xestora, das accións realizadas ata ese momento pola Asociación. Neste punto destacaron a presentación do logotipo da Asociación, deseñado por Luís Galán, e a presentación da páxina web, www.betanzoshistorico.com posta en marcha por Eduardo Vázquez e Roberto Leiro. Esta páxina nace como un foro onde, ademais de colgar información referente á asociación,  informarase das actividades, noticias e eventos que teñan relación directa ou indirecta co Casco Histórico de Betanzos. Neste sentido invítase á participación da cidadanía, deixando comentarios ás noticias, ou remitindo suxestións vía e-mail a correo@betanzoshistorico.com

O segundo punto do día, a presentación da proposta de Xunta Directiva, foi aprobada por unanimidade. Así, esta primeira Xunta Directiva queda constituída polos seguintes membros: Antonio Asensi, presidente, David Martínez, vicepresidente, Mercedes Rosende, secretaria, Patricia Teijeiro, tesorera, e os vocales, José Manuel García, Mari Carmen García, Maria do Carmen Porto, Xaquín López e Segundo Jorge.

Antonio Asensi Presidente

David Martínez Vicepresidente

A continuación presentáronse as actividades que vai realizar a Asociación a curto prazo. Destaca a presenza da Asociación na Feira Franca Medieval, cun posto de carácter informativo sobre a Asociación e co obxectivo de darse a coñecer a un público máis amplo. No posto da Feira Medieval, insistindo na procura de participación dos cidadáns, vanse a estrear uns buzóns de suxestións, rotulados con deseño de Luís Galán, presentándose durante a asemblea un modelo dos mesmos. Estes pretenden ser unha vía de comunicación e de presentación de propostas á Asociación, complementaria á páxina web e correo electrónico. Outra das actividades é a elaboración dunha enquisa entre a poboación que reside, visita ou goza do Casco Histórico, co obxectivo de evaluar unha orde de prioridades que sexa representativo dos intereses e inquietudes dos cidadáns. Do mesmo xeito que os buzóns, a enquisa comezará durante a Feira Medieval. Ademais, a Asociación reservouse unha sorpresa para presentar na Feira, invitando aos socios a visitar a caseta. Este punto do día concluíu coa intención de presentar a Asociación ao goberno municipal e a todos os partidos políticos con representación no Concello, durante as próximas semanas.

A Asemblea, á que asistiron un total de 45 socios con dereito a voto, finalizou cos agradecimientos a entidades colaboradoras e a aquelas persoas que arrimaron o ombreiro durante o arranque dun proxecto que pretende ilusionar á cidadanía coa pretensión de volver poñer en valor o noso Casco Histórico.